so malam mar tu
awan lebe itang
sadiki le mo seciri ujang
rindu

parampuang
yang ta haga-haga
baharap bulan batunjung
kong bawa tu payung
rupa dilagu-lagu

so banya tu ombong rindu
malakat di ubun-ubun setiap malam
kong skarang badai rindu
mo bekeng hati lebe kelam

“biar jo, pake bulan pake payung,”
tu parampuang bacirita
waktu dia lupa bawa payung

Imran Laha

Suara bunggo** seakan menambah semarak malam
Diantara kepulan asap hitam dari lampu botol
Nyanda parduli minya’ tanah so mahal
Yang penting tradisi tetap ta piara
Ini bukan soal pemborosan
Ini soal kepercayaan
Jangan ganti deng lampu listrik
Nanti depe makna mo ta piaro
Kita ulang lagi e…
Ini bukan soal boros
Karna bulum tantu lampu listrik mo ba ganti makna dari lampu botol
Karna so disitu juga depe estetika
So disitu tampa orang ba lia akang depe sejarah
Kase biar bunggo tetap ba bunyi
Janga ganti lampu botol deng lampu listrik
Karna ini, malam Tumbilotohe

Tumbilotohe : malam pasang lampu di Gorontalo biasanya dilaksanakan tiga hari sebelum hari raya Idul Fitri
Bunggo : biasa juga dikenal dengan nama Lantaka atau lentaka, meriam bambu/bulu

24 – 09 – 2007

Retro Epic

Ini cirita tentang kita
Waktu masi skola di SMA taong 1992

Dapa inga tu dulu-dulu
Waktu katu kita masi sadiki muda
Jaman blum tau hidop pe siksa
Tu waktu torang nyanda farek
Kalou nyanda singga mega mol
Apa lagi ka hai ki ato gacho
Tiap malam minggu bagini
Paling makang pisang ato mi
Mangada plein tikala

Torang ley blum bawa-bawa hp
So mujur tu ada telpon ruma
Kalo perlu kurang cari saratus
Kong lari-lari ka telepon umum
For mo telepon kape-kape Memora
Itu komang torang sorasa

Amper tiap hari barmaeng bola
Di skola jam bersenang sampe bel maso
Abis itu tu klas kurang bobou naga
Lantarang samua laki-laki so mandi suar
Mar yang penting torang nyanda saki mata
Haga-haga televisi deng jam-jam
Main winning kong bayar ley

Memang  torang kala gaya katu no
Blum ja bapake tu gombrang, jangkis,
Apalagi span-span
Blum ada tu nama gaul, choi-choi,
Apalagi dugem
Kalou takumpul deng tamang-tamang
Paling bakuti gitar
Scorpions, Bonjovi, Stryper, Guns ato Metallica
So rasa jago kalo so hafal
Depe pemain pe nama
Blum ada Corner, Musro, en tu sagala pub kasiang

Mar sadap kwa tu dulu
Pisang 50, frak 150, bakso 250, bola plastik 500, cokakola blek 700, kaset 2000, dragon 5000, …
Samua kasiang masih mura
Cuma komang memang masi siksa
Tu nama cari maitua
Musti banya bardoa deng bakaca
Soalnya dorang blum ja lia oto!
Lia henpon lia merek
Nya’ rupa skarang do ce
Parampuang kurang ja muat dari pinggir jalang!

Manado, Ado Pe Sadap!

Pe sadap ja tinggal di Manado
Ngana mo kamana-mana gampang
Nae mikro frak saribu
So dari ujung-ka ujung
Kacuali kalo taprop di 45
Satu jam oto bajalang satu meter
Deng pas Natal taong baru
Sopir minta bayar dua kali lipa

Pe sadap ja tinggal di Manado
Depe udara nya’ panas nya’ dinging
Anging sadap batiop di pohong bulu
Matahari pe gaga ujang nya’ lama
Kacuali kalo musim barat
Seng ruma kurang punggu kampung sabla
Omba pe basar Ikang pe mahal
Kuala guhi enter karamba anyor

Pe sadap ja tinggal di manado
Di kampung masi baku-baku bantu
Ba mapalus kong baku-baku bae
Samua basudara kong baku-baku sayang
Kacuali sala maso orang pe kampung
Apa lagi so langgar jam 9
Kalo nyanda dapa pajak dapa pulungku
Lebe soe cumu slamat malam

Pe sadap ja tinggal di Manado
Depe orang samua taat baibada
Samua agama baku mangarti
Pemerenta bamoral deng tau atoran
Kacuali di kasus mbh geit
Amusemen so mancari di mana-mana
Captikus di amper samua warong
Tambio sport tafiaro di jalang